Bokmål

Li bokmål, c' est ene des deus ortografeyes rfondowes do norvedjin avou l' nynorsk. Ratourné literålmint e walon, bokmål dene « lingaedje des lives ».

Definicion

Li bokmål vént do riksmål, ki sereut lomé e walon li « lingaedje do rweyåme ». Li riksmål egzistêye co todi eyet bråmint des djins pinsnut k' ces deus varyistés sont les minmes. Tenawete ki l' riksmål n' est nén oficir eyet c' est ene varyisté pus wårdiveuse k' el bokmål.

Li bokmål est foirt sovint lomé li « lingaedje des lives », paski les norvedjin-cåzants djåznut nén e bokmål, mins avou leus diyalekes.

Li bokmål rote come li rfondou. Ci n' est k' ene ortografeye. Les deus ont ene môde di prononçaedje erîlé, mins nolu n' el uze. C' est puvite po-z aspaler les aprindisses.

Istwere

Li riksmål a passé e 1907, tins k' el bokmål n' est arivé oficirmint k' e 1929. Tolminme k' el ci k' a l' pus ovré dsu, Knud Knudsen, a morou, e 1895. Ci linwinceu ci s' a margayî lonmint avou Ivar Aasen. Li prumî vla mete so pî on sistinme ki dischind do daenwès-norvedjin, tins k' l' ôte inma mia d' erloukî åzès diyalekes del Norvedje. Did la disk' enute, cisse-ci a cnoxhou des rfômes d' escrijhaedje k' araedje.

Des norvedjins ont asprové d' erfonde li bokmål avou l' nynorsk. Li pordjet a stî metou sol costé, e 2002.

Cåzaedje

Ci rfondou ci est cåzé cåzumint tot avå el Norvedje, såf å Coûtchant wice ki les djins djåznut l' nynorsk. Asteme ki l' bokmål eyet l' nynorsk sont deus rfondowès ortografeyes do norvedjin. Do côp, ces deus rfondous la n' sont nén deus diferins lingaedjes.