اس صفحہ میں اردو ویکیپیڈیا کی حکمت عملی بیان کی گئی ہے، جسے ویکی نویسوں میں انتہائی مقبولیت حاصل ہے نیز یہ تمام صارفین کے لیے واجب الاتباع معیار بھی ہے۔ آپ اس صفحہ میں ترمیم کرسکتے ہیں، لیکن خیال رہے کہ آپ کی کوئی ترمیم کسی اتفاق رائے کے خلاف نہ ہو۔
یہ صفحہ ایک نظر میں: حقوق نسخہ کی پابند تصاویر اپلوڈ کرتے وقت انتہائی احتیاط برتیں، ان تصاویر کے توضیحی صفحات پر تصاویر کے مآخذ اور حقوق نسخہ کی تفصیلات کو مکمل وضاحت سے بیان کریں، اور جہاں تک ممکن ہوسکے ایسی تصاویر اپلوڈ کرنے کی کوشش کریں جو نفع بخش اور دوبارہ استعمال کے قابل ہو۔
ویکیپیڈیا میں کسی دوسری سائٹ سے تصاویر حاصل کرکے اپلوڈ کرنے کی اجازت ہے، بشرطیکہ اس سائٹ کا مواد حقوق نسخہ کا پابند (copyrighted) نہ ہو۔ اس سلسلہ میں یہ وضاحت بھی ضروری ہے کہ علاحدہ علاحدہ مواد پر حقوق نسخہ کی وضاحت ضروری نہیں، کسی بھی ویب سائٹ کا عمومی اعلان کہ یہاں موجود مواد کے حقوق بنام فلاں محفوظ ہیں کافی سمجھا جائے گا، اب خواہ وہاں موجود تصویر کے تحت حقوق نسخہ کی پابندی کی وضاحت نہ ہو۔ نیز ایسی ویب سائٹس جن کے متعلق نہ ویب سائٹ پر اور نہ ہی کہیں یہ وضاحت موجود ہو کہ آیا اس میں پیش کیے جانے والا مواد حقوق نسخہ کا پابند ہے یا نہیں، ایسی صورت میں وہاں سے مواد ویکیپیڈیا پر منتقل کرنے کی اجازت نہیں ہوگی تاآنکہ اس ویب سائٹ کے مالکان اس کی اجازت مرحمت فرمادیں یا مواد کے دائرہ عام (public domain) میں ہونے کی وضاحت کر دیں۔
اگر تصویر ساز نامعلوم ہو تو ایسی تصاویر یہاں اپلوڈ نہ کی جائیں۔
اگر کوئی صارف تصویر اپلوڈ کرتے وقت اجازت نامہ منتخب نہ کرے تو اجازت ناموں کی فہرست میں سے اجازہ نامعلوم کو منتخب کریں، اس صورت میں تصویر سات دن بعد حذف کردی جائے گی۔
اگر کسی تصویر کے خالق کی وفات پر 100 سال گزر چکے ہیں تو وہ تصویر خودبخود دائرہ عام میں آجاتی ہے، اس کے اپلوڈ کرنے کی اجازت ہے۔
