Romani
Romani of Romanes is ne sproake van t zigeunervolk de Roma. Wat geleardn meant det dr meardere soortn Romani beent, dee at allemoal aparte sproakn beent, umdet t dialekt van verskeaidene stämme slim oet mekaander kan loopn.
Oonderzeuk hef oet eweazn det t Romani verbaand hef met sproakn in noord-India en Pakistan, zo as t Hindi, mear ook t Punjabi. Doarumme wörd ook an enömn det de Roma doar oorsproonkelik oet de buurte komt, umdet an de haande van verskeaidene leenwöarde n pad te volgen is van öarn trek noar t westn. Ne studie van kort geleene wis oet det t Romani verbaand hef met t Sinhala.
De meeste Romaas hebt öare sproake beheuldn, mear doar ook aait de sproake bie eleard van t laand woer at ze tiedelik wondn, want det kon wal honderden van joarn doern. Van ooldsher is de sproake Indisch, mear zee hef ook Iraanse, Armeense, Griekse en Sloaviese invloodn ehad. De stämme dee at wieter treukn hebt zik nog mear noar aandere sproakn an epast. Det is meesttieds wat slimmer as allene mear n antal leenwöarde: de Roma op de Balkan hebt nog aait dialekte met alle acht naamvaln van t Sanskriet bewoard, wat meugelik was duur de stoarke verbuging van de Sloaviese sproakn, mear de Karpaatn, dee at nöast öar eegne sproake ook Duuts leardn, hebt zowat alns dr van dr achterhen edoan. Doarumme köant völle Romaas mekoar rechtevoort neet mear verstoan.
Kortns beent ze begunn met t opskriewn en standaard-maakn van t Romani. Doarumme geet t dr op an det de dialekte töt meardere sproakn oetdiejn zöalt.
Refereansies
[bewark | bronkode bewarken]- Gray, RD; Atkinson, QD (2003). "Language-tree divergence times support the Anatolian theory of Indo-European origin" Nature. 426, 435-439.