Georgisch

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

't Georgisch of Kartvelisch (Georgisch Kartuli, ქართული) is de nationaal taol vaan Georgië, hurend bij de Zuid-Kaukasische taole. De taol weurt door al etnische Georgiërs in Georgië zelf (ca. 4 miljoen, 83% vaan de bevölking) en nog door 3,4 miljoen Georgiërs vaan boete de grenze gesproke, veural in Iran, Azerbaidzjan, Törkije en Rusland. 't Georgisch weurt in 't Georgisch sjrif gesjreve.

't Georgisch heet zeve naomvalle en is 'n ergatief en agglutinerende taol. De naomvalle zien nominatief, ergatief, datief, genitief, instrumentalis, adverbialis en vocatief. 'n Opvallend kinmerk is 't veurkoume vaan oongeluifeleke clusters vaan consonante, die neet ins, wie in de Slavische taole, op 'n r of 'n ander liquida hove steune. Theoretisch 't langs meugelek woord is gvprtskvni; meh umtot dit "Diech sjèls us" beteikent zal me dit normaal neet tegekoume; e normaal woord is evels wel mtsvrtneli ("traineur").

't Georgisch heet 'n rieke literair traditie.