Peite

Peite de ouro escita do século IV a. C., exposto no Museo do Ermitage, en San Petersburgo, Rusia.

O peite, pente ou pieite é un utensilio plano con púas que serve para arranxar, desenredar e limpar o cabelo ou compor outras fibras. Existen diferentes modelos, que varían no número e grosor das púas, segundo o tipo de cabelo ou fibra que se desexe arranxar. Os peites fabricábanse outrora en cuncha de tartaruga carei pero ao estar prohibida a caza da tartaruga, agora os materiais máis habituais son o plástico e a madeira.

Existen os seguintes tipos de peites:

• Peites de púas anchas. Úsanse para peitear cabeleiras con moito pelo e para definir os rizos.
• Peites de púas estreitas. Son útiles para peitear o cabelo mollado.
• Peites mixtos, que combinan púas anchas e estreitas. Poden usarse indistintamente unhas ou outras simplemente dándolle media volta ao peite.