Stanley Kubrick

Stanley Kubrick
	; Irudi gehiago
Bizitza
Jaiotzako izen-deiturak	Stanley Kubrick
Jaiotza	Bronx eta New York, 1928ko uztailaren 26a
Herrialdea	Ameriketako Estatu Batuak ; Erresuma Batua
Talde etnikoa	estatubatuar judua
Lehen hizkuntza	estatubatuar ingelesa
Heriotza	Childwickbury Manor (en) eta Harpenden, 1999ko martxoaren 7a (70 urte)
Hobiratze lekua	Childwickbury Manor (en)
Heriotza modua	berezko heriotza: miokardio infartu akutua
Familia
Ezkontidea(k)	Ruth Sobotka (en) (1954 - 1957); Christiane Kubrick (mul) (1958ko apirilaren 14a - 1999ko martxoaren 7a)
Seme-alabak	ikusi Vivian Kubrick (en) ;
Hezkuntza
Heziketa	City College of New York (en) ; William Howard Taft High School (en)
Hizkuntzak	ingelesa
Jarduerak
Jarduerak	film-zuzendaria, argazki-zuzendaria, argazkilaria, zinema ekoizlea, gidoilaria, film-muntatzailea, kameraria, ekoizle exekutiboa, eszenografoa, errealizadorea eta produktorea
	Parte-hartzailea Documenta 6 (en) ;
Altuera	169 zentimetro
Lantokia(k)	Hollywood
Jasotako sariak	ikusi Academy Fellowship Award (2000) ; Efektu berezi onenen Oscar Saria (1968) : 2001: A Space Odyssey; Golden Lion for Lifetime Achievement (1997) ; Science Fiction and Fantasy Hall of Fame (2014) ; Arte eta letren komendadorea (1995eko urtarrilaren 26a) ; National Board of Review Award for Best Film ; BAFTA Award for Best Direction ; Hugo Award for Best Dramatic Presentation (1965, 1969, 1972) : Dr. Strangelove, 2001: A Space Odyssey, A Clockwork Orange; Sitges Grand Honorary Award (2008) ;
Influentziak	Max Ophüls
Kidetza	Writers Guild of America, West (en)
Genero artistikoa	misteriozko zinema; beldurrezko zinema; thrillerra; Zinema beltza; psychological horror film (en) ; gerra-filma; ekintza-filma; abenturazko filma; psychological thriller film (en) ; film dramatikoa; krimenezko filma; film komikoa; zientzia-fikziozko filma; zinema historikoa; film dokumentala
Sinesmenak eta ideologia
Erlijioa	ateismoa
	kubrickfilms.com

Stanley Kubrick (1928ko uztailaren 26a - 1999ko martxoaren 7a) Bronxeko familia judu batean jaiotako Ameriketako Estatu Batuetako zinema zuzendari, argazkigile, gidoilari eta ekoizlea izan zen.

XX. mendeko zuzendari eraginkorrenetakoa da, zinema erabat berritzailea egin baitzuen. Haren film gehienak literaturako lanetan oinarriturik daude eta istorio laburra badute ere, oso argiak eta zorrotzak dira. Teknikoki biziki landuak, pop zein musika klasikoa nahasten dira.

Zinema eta argazkilaritzaz aparte, xakea, musika, jazza batez ere (Taft Swing Band izeneko taldean bateria jo zuen) gustuko zituen. Gustu horiek guztiek haren bizitzan eta lanetan eragin nabaria izan zuten.

Haren zinemaren ezaugarririk nagusiak perfekzio teknikoa eta sinbolismo intelektual sakona dira. Oso zehatza izan zen bere filmetan, zertzeladarik txikiena era kontrolatzen zuen eta mugaraino eraman zituen eskura zituen baliabide zinematografikoak. Haren lan nagusietako bat Laranja mekanikoa da.

Bizitza

Gaztaroa

Stanley Kubrick 1928ko uztailaren 26an jaio zen Bronxen (New York, AEB), klase altuko familia judu batean^[1]^[2]. Gazte-gaztetik erakutsi zuen musika, batez ere jazza, xake^[3] eta argazkigintzarako zaletasuna^[4]. Zaletasun horiek eragina izan zuten gero haren zuzendari lanean. Ikaslea zela argazki batzuk saldu zizkion Look aldizkariari eta 17 urterekin bertan lana lortu zuen^[5].

Lehen filmak

1951n, lehen filma egiteko erabili zuen aurreztuta zeukan dirua Walter Cartier boxeolariari buruzko dokumentala izan zen: Day of The Fight. Flying Padre (1951) eta The Seafarers (1953) film laburrak egin zituen ondoren.

1953an, Fear and Desire, lehen film luzea egin zuen, jaberik gabeko lurren alde borroka egiten duen gudari talde bati buruz. Hamar langile baino gutxiagorekin egin zuen eta bera arduratu zen ia lan gehienez; bi lagunek eta lehen emazteak (Toba Metz, 18 urterekin ezkondu zen harekin) lagundu zioten. Film horren kopia askorik ez dago, Kubrickek berak deuseztatzeko eskatu baitzuen: haren esanetan, "gaztaroko akatsa" zen. Ez zuen arrakasta handirik izan, baina hurrengo lana finantzatzen lagundu zion: Killer's Kiss (1955), gangster baten alaba ezagutu eta harekin maitemindu den boxeolari baten istorioa kontatzen da intrigazko film horretan. Ruth Sobotka-k, haren bigarren emaztea izan zenak, antzezten du hor. Baliabide gutxirekin egin zuen, baina Kubrickek zuri-beltzezko argazkiekin zuen maisutasunak NBCko ekoizle James B. Harrisen arreta piztu zuen.

Arrakasta Hollywooden

1956an, Kubrick eta Harrisek ekoiztetxe bat sortu zuten eta bien artean The Killing filma egin zuten, Lionel Whiten nobela batean oinarrituta dago eta protagonista Sterling Hayden da. Hipodromo batean egindako lapurreta kontatzen du. Garai hartan berrikuntza handia izan zen nola erabili zuen denbora zinematografikoa.

Hollywoodeko pertsonaia batzuen arreta piztu zuen lan horrek, horien artean, Kirk Douglasena: harekin bost film egiteko kontratua izenpetu zuten. Taldearen lehen film Paths of Glory (1957) izan zen. Douglas bera protagonista izan zen, Dax koronelaren paperean: Lehen Mundu Gerran, etsaiaren aurrean koldarki jokatzeaz salatu zituzten soldaduak defendatu behar ditu. Kubricken lehen film polemikoa izan zen. Film hartan, bere alderik gizatiarrena eta sentikorrena erakusten du Kubrickek, inoiz egin den amaierarik hunkigarriena du. Filma egiten ari zela, hirugarren eta azken emaztea ezagutu zuen, Suzanne Christianne.

1960an Douglasekin egin zuen berriz topo. Aktorea Spartacus egiteko zuzendari bila zebilen, Anthony Mannen ordez. Kubrickek proposamena onartu zuen, halako aurrekontu handiko filmak bere ibilbideari bultzada handia emango ziolakoan. Hiru Oscar sari irabazi zituen eta zinema-aretoetan lortu zuen lehen arrakasta izan zen. Kubricken lanak bultzada handia izan zuen. Douglasekin beste hiru film egiteko zuten kontratua bertan behera uztea lortu zuten Kubrick eta Harrisek. Bien hurrengo filma Lolita (1962) izan zen, Vladimir Nabokoven nobela batean oinarritua. Zalaparta handia sortu zuen. Humbert Humberten (James Masonek antzeztua) istorioa kontatzen du: adin ertaineko gizon hori 14 urteko neska batekin maitemindu da eta, bera lortzeko, neskatilaren amarekin ezkondu. Beste maisulan bat da, Kubrickek istorioak kontatzeko zuen gaitasun bikaina erakusten du. Filma, hainbat arrazoirengatik, Ingalaterran egin zuen.

Lolita egin ostean, Harris eta Kubrickek elkartea desegin zuten eta zuzendariak bakarka ekoitzi zituen hurrengo filmak. Entzute handiko idazleen lanak egokitzen segitu zuen: Dr. Strangelove or: How I Learned to Stop Worrying And Love The Bomb, A Clockwork Orange, Barry Lyndon eta Eyes wide shut filmetan, adibidez.

Gerra Hotza eta Kubako misilen krisiaren garaian, 1964an, Dr. Strangelove egin zuen. Hasieran gaia seriotasunez lantzeko asmoa zuen arren, azkenean umore beltzeko komedia egin zuen. Peter Sellers aktoreak hiru pertsonaiaren papera egin zuen bertan. Arrakasta handia izan zuen, baina baita kritikak ere, AEBetako defentsa sistemari buruz ematen zuen irudi txarragatik.

Zinema berritzen

1960ko hamarkadaren amaieran, Britainia Handira bizitzera joan zen eta hurrengo filmak hantxe egin zituen.

1968an, zinemaren historiako film moderno eta arriskutsuenaz etorri zitzaion bere ibilbidearen une gorena: 2001: A Space Odyssey. Zientzia-fikziozko film horretan gizakiaren etorkizuneko eboluzioa kontatzen du. Zinemaren historiako filmik onenen artean kokatu ohi da: harengatik, Oscar saria jaso zuen.

*The Clockwork Orange* filmean erabilitako irudi erotikoetako bat.

1971n Anthony Burgessen eleberri bat egokitu zuen The Clockwork Orange filmean. Alexen istorioa kontatzen du. Gazte oso oldarkorra da eta bere denbora-pasa gogokoenak bortxaketa, muturreko bortizkeria eta Beethoven dira. Filmean erakusten ziren irudi gogorrak eta kalean hainbat eszena imitatu zituztelako, zinema-aretoetatik kentzeko eskatu zuen Kubricek. Oscar sarietarako hiru izendapen jaso zituen: moldatutako gidoi onenarena, zuzendari onenarena eta ekoizle onenarena.

Terrorezko filmaketa

Film futurista biren ostean, gaia aldatu eta Barry Lyndon lana egin zuen. XVIII. mendean kokatutako istorioa da eta William Makepeace Thackerayk XIX.ean idatzi zuen. Kritikak aspergarri eta klasikoegia zela esan zuen. Hala ere, Oscar sarietarako zazpi izendapen jaso zituen, zuzendariaren aurreko edozein filmek baino gehiago eta azkenean lau irabazi zituen.

1980an Stephen Kingen eleberri batean oinarritutako beldurrezko film bat estreinatu zuen, The Shining. Filmak arrakasta ekonomiko handia izan zuen; kritikak ordea, ez zion harrera ona egin. Egun, genero horretako film onenen artean dago.

Azken lanak

Hurrengo filma egin zuenerako zazpi urte pasa ziren. 1987an Full Metal Jacket estreinatu zuen. Berriz gerraren gaia jorratu zuen, baina oraingoan Vietnamgoa. Full Metal Jacket filmarekin ospea berreskuratu zuen eta kultuzko zuzendari bihurtu.

1990eko maiatzean, Martin Scorsese, Woody Allen, Francis Coppola, Steven Spielberg, Robert Redford, Sydney Pollack eta George Lucas zinemagileekin batera, Film fundazioa sortu zuen, filmen zaharberritzea eta zaintza bultzatzen dituen erakundea.

Azken lana Eyes Wide Shut (1999) izan zen, Arthur Schnitzlerren nobela batean oinarritutako drama psikologikoa. Tom Cruise eta Nicole Kidmanek New Yorkeko bikote baten papera egiten dute bertan, itxuraz pozik bizi dira euren etxean, baina ametsetan eta fantasietan benetan nolakoak diren ageri da. Zuzendaria hil ostean estreinatu zen, izan ere, muntaia amaitu gabe zendu zen, lo zegoela bihotzekoak emanda, 1999ko martxoaren 7an.

Kubriken lana hainbat alditan saritu dute. Oscar sarietarako 13 izendapen jaso zituen, baina bakarra irabazi zuen bere izenean, efektu bereziena 2001: A Space Odyssey filmagatik. 1997ko martxoan Director Guild of Americak ematen duen saririk handiena jaso zuen, David Wark Griffith izenekoa; eta irailean berriz, bere ibilbide guztiari eskainitako Urrezko Lehoia eman zioten Veneziako Mostran.

Filmografia

Fear and Desire (1953)
Killer's Kiss (1955)
The Killing (1956)
Paths of Glory (1957)
Spartacus (1960)
Lolita (1962)
Dr. Strangelove or: How I Learned to Stop Worrying and Love the Bomb (1964)
2001: A Space Odyssey (1968)
A Clockwork Orange (1971)
Barry Lyndon (1975)
The Shining (1980)
Full Metal Jacket (1987)
Eyes Wide Shut (1999)

Erreferentziak

↑ (Ingelesez) Am, Lisa; July 25; Contemporary, 2016Courtesy of. «The Secret Jewish History of Stanley Kubrick» The Forward (Noiz kontsultatua: 2019-04-20).
↑ Baxter, John, 1939-. (1998). Stanley Kubrick : a biography. HarperCollins ISBN 0006384455. PMC 43142836. (Noiz kontsultatua: 2019-04-20).
↑ (Ingelesez) Bernstein, Jeremy. (1966-11-05). Stanley Kubrick: The Master. ISSN 0028-792X. (Noiz kontsultatua: 2019-04-20).
↑ LoBrutto, Vincent.. (1999). Stanley Kubrick : a biography. (1st Da Capo Press ed. argitaraldia) Da Capo Press ISBN 0306809060. PMC 40104995. (Noiz kontsultatua: 2019-04-20).
↑ Duncan, Paul, 1964-. (2011). Stanley Kubrick : visual poet 1928-1999. Taschen ISBN 9783836527750. PMC 707601760. (Noiz kontsultatua: 2019-04-20).

Kanpo estekak

Wikimedia Commonsen badira fitxategi gehiago, gai hau dutenak: Stanley Kubrick

Stanley Kubricki buruzko erreportajea Argia aldizkarian.

Datuak: Q2001
Multimedia: Stanley Kubrick / Q2001

[1] (Ingelesez) Am, Lisa; July 25; Contemporary, 2016Courtesy of. «The Secret Jewish History of Stanley Kubrick» The Forward (Noiz kontsultatua: 2019-04-20).

[2] Baxter, John, 1939-. (1998). Stanley Kubrick : a biography. HarperCollins ISBN 0006384455. PMC 43142836. (Noiz kontsultatua: 2019-04-20).

[3] (Ingelesez) Bernstein, Jeremy. (1966-11-05). Stanley Kubrick: The Master. ISSN 0028-792X. (Noiz kontsultatua: 2019-04-20).

[4] LoBrutto, Vincent.. (1999). Stanley Kubrick : a biography. (1st Da Capo Press ed. argitaraldia) Da Capo Press ISBN 0306809060. PMC 40104995. (Noiz kontsultatua: 2019-04-20).

[5] Duncan, Paul, 1964-. (2011). Stanley Kubrick : visual poet 1928-1999. Taschen ISBN 9783836527750. PMC 707601760. (Noiz kontsultatua: 2019-04-20).

[1]

[2]

[3]

[4]

[5]

i e a Stanley Kubrick
Zuzendaria	Fear and Desire (1953) Killer's Kiss (1955) The Killing (1956) Paths of Glory (1957) Spartacus (1960) Lolita (1962) Dr. Strangelove (1964) 2001: A Space Odyssey (1968) A Clockwork Orange (1971) Barry Lyndon (1975) The Shining (1980) Full Metal Jacket (1987) Eyes Wide Shut (1999)
Laburmetraiak	Day of the Fight (1951) Flying Padre (1951) The Seafarers (1953)
Bestelakoak	World Assembly of Youth (1952) A.I. Artificial Intelligence (2001) Stanley Kubrick: A Life in Pictures (2001) Colour Me Kubrick (2006) Stanley Kubrick's Boxes (2008) Room 237 (2012)